ക്രിസ്തുവിനു ശേഷം 6-ആം നൂറ്റാണ്ടിലെ കാലനിർണയം നടത്തപെട്ട, ക്രിസ്തുവിന്റെതെന്നു കരുതാവുന്ന ഒരു പെയിന്റിംഗ് കണ്ടെടുക്കപ്പെട്ടു. ഇതുവരെ കണ്ടു പരിചയമില്ലാത്ത ഒരു രൂപം കണ്ട വിശ്വാസികൾ പലരും ഇതിനെ എതിർത്ത് സംസാരിക്കുന്നതും കേട്ടു. ചുരുണ്ട മുടിയുള്ള യേശു പലർക്കും സങ്കല്പ്പിക്കാവുന്നതിനു അപ്പുറം ആണെന്ന് തോനുന്നു.
തികച്ചുമൊരു ഏഷ്യൻ മതമായ ക്രിസ്തുമതവും ക്രിസ്തുവും പാശ്ചാത്യം എന്ന് തെറ്റിധരിപ്പിക്കപ്പെടും മട്ടിൽ ആണ് പ്രചരിപ്പിക്കപ്പെടുകയും, ക്രിസ്ത്യാനികളിൽ പോലും പലരും വിശ്വസിക്കുകയും ചെയ്യുന്നത്. പല കാരണങ്ങളിൽ ഒന്ന് യേശുവിന്റെത് എന്നാ മട്ടിൽ പ്രചരിക്കപ്പെടുന്ന ഫോട്ടോ ആണ് എന്ന് പറയുന്നതില തെറ്റില്ല. ഷാമ്പു ചെയ്തു മനോഹരമായി കാണപ്പെടും മട്ടിലുള്ള, വളർത്തി തോളറ്റം വെട്ടി നിരത്തിയ സ്വർണനിറമുള്ള തലമുടിയും പാശ്ചാത്യ മുഖഭാവവും ഉള്ള യേശുവിനെയാണ് എല്ലാവർക്കും പരിചയം.
കണ്ട ചിത്രങ്ങൾ ഒരു ചിത്രകാരന്റെ ഭാവന എന്നതിനെകാൾ അതിനെ വച്ചാരാധിക്കാനുള്ള പ്രോത്സാഹനവും പല സഭകളും നൽകി. യേശുവിന്റെ പടിപ്പിക്കലുകളിൽ പാശ്ചാത്യ വിശദീകരങ്ങളും കലർത്തുകയും, അതിനു നേതൃത്വം നല്കാനെന്നോണം പാശ്ചാത്യ മിഷനറിമാരുടെ ഇറക്കുമതി നടത്തുകയും ചെയ്തതോടെ, ഏഷ്യയിൽ ജനിച്ചു, വളർന്നു, പ്രവർത്തിച്ച യേശുവിൻറെ പഠിപ്പിക്കലുകളെ വിശ്വസിച്ച അനുയായികളുടെ കൂട്ടം പാശ്ചാത്യ മതാനുയായികൾ എന്ന് മറ്റുള്ളവരുടെ മുന്നിൽ തെറ്റിദ്ധരിക്കപ്പെട്ടു. ഒന്നാം നൂറ്റാണ്ടിൽ തന്നെ ഭാരത മണ്ണിൽ യേശു ശിഷ്യൻ തോമസ് എത്തിയപ്പോൾ മുതൽ തന്നെ ക്രിസ്ത്യാനികൾ ഉണ്ടായി എന്നും ചരിത്രം പറയുമ്പോൾ, ഇത് പാശ്ചാത്യരുടെ കീഴിൽ കൊണ്ട് കെട്ടാനായി ചില നൂറ്റാണ്ടുകളായി നടന്നു വന്ന ശ്രമങ്ങളുടെ ഭാഗവും കൂടിയാവണം ഇന്ന് കണ്ടു വരുന്ന ക്രിസ്തു ചിത്രം.
ബൈബിൾ ആധാരമാക്കുകയാണെങ്കിൽ ആദിമ ക്രിസ്ത്യാനിയായിരുന്ന പൌലോസ് പുരുഷന്മാർ മുടി നീട്ടി വളർത്തുന്നതിനെ ശക്തമായി എതിർക്കുന്നത് കാണാം. (കൊരിന്ത്യർക്കെഴുതിയ ഒന്നാം ലേഖനം പതിനൊന്നാമത്തെ അദ്ധ്യായം) ക്രിസ്തു മുടി നീട്ടി വളർത്തിയ ആളായിരുന്നു എങ്കിൽ ക്രിസ്തു ശിഷ്യനായ പൌലോസ് അത് എതിർക്കേണ്ട കാര്യവും ഉണ്ടായിരുന്നില്ല എന്ന് നാം വിശ്വസിക്കെണ്ടതായി വരും.
ഒറ്റിക്കൊടുക്കുന്നതിനായി യുദാസിനു യഹൂദന്മാർ 30 വെള്ളിക്കാശു കൊടുത്തെന്നും, ചുംബനം കൊണ്ട് ക്രിസ്തുവിനെ കാട്ടി കൊടുത്തു എന്നതിൽ നിന്നും തന്നെ, മറ്റു യഹൂദ പുരുഷന്മാരുമായി പറയത്തക്ക രൂപ വിത്യാസം ക്രിസ്തുവിന് ഇല്ലായിരുന്നു എന്നും മനസിലാക്കെണ്ടാതായി വരും.
ക്രിസ്തുവിനെ കുറിച്ചുള്ള പ്രവചനങ്ങളായി വിശ്വസിക്കപ്പെടുന്നിടത് ഇങ്ങനെ കാണുന്നു, "അവന്നു രൂപഗുണം ഇല്ല, കോമളത്വം ഇല്ല; കണ്ടാൽ ആഗ്രഹിക്കത്തക്ക സൌന്ദര്യവുമില്ല." കുറഞ്ഞത് രണ്ടു സ്ഥലങ്ങളിലെങ്കിലും പുരുഷാരതിനിടയിലേക്ക് അവനിറങ്ങി മറഞ്ഞതായി കാണുന്നു.
യേശു ജീവിച്ചിരുന്ന കാലഘട്ടത്തിലെ യഹൂദ പുരുഷന്മാർക്ക് നീളമുള്ള മുടി ഉണ്ടായിരുന്നില്ല എന്ന് ചരിത്രകാരന്മാർ പറയുന്നു. ഗ്രീക്ക്, റോമ വംശജര്ക്കും ഇടതൂർന്ന, നീളമുള്ള മുടി ഉണ്ടായിരുന്നില്ലെന്ന് അക്കാലഘട്ടങ്ങളിലെ നാണയങ്ങളിലും മറ്റുമുണ്ടായിരുന്ന രൂപങ്ങളിൽ നിന്ന് ഊഹിക്കപ്പെടുന്നു.
അന്നത്തെ കാലത്ത്, നീട്ടി വളർത്തിയ താടിയും സാധാരണ പുരുഷന്മാർക്ക് ഉണ്ടാവില്ല എന്നും ചൂണ്ടികാനിക്കപെടുന്നു.
No comments :
Post a Comment